DKT. MWINYI: WATANZANIA WANAWAJIBU KATIKA MUUNGANO


                                             Na Mwandishi Wetu, Pemba

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, amesema Watanzania wana wajibu wa kuhakikisha Muungano wa Tanzania, amani, utulivu na umoja wa kitaifa vinalindwa, vinaimarishwa na kudumishwa wakati wote.

Rais Dkt. Mwinyi ameyasema hayo leo, tarehe 02 Aprili 2026, katika Uzinduzi wa Mbio za Mwenge wa Uhuru Kitaifa 2026 uliofanyika katika Uwanja wa Gombani, Mkoa wa Kusini Pemba.

Rais, Dkt. Hussein Ali Mwinyi, akipoke nakala ya kitabu cha Miaka 60 ya Mbio za Mwenge wa Uhuru pamoja na Mwongozo wake wa 2026, kutoka kwa Waziri wa Maendeleo ya Vijana Tanzania, Joel Arthur Nanauka, wakati wa uzinduzi wa mbio hizo.

 Pia amezitaka tasisi za dini, asasi za kiraia, vyombo vya habari na wananchi wana wajibu wa kulinda misingi ya utu na kuheshimu utawala wa sheria ili kuwa na Taifa linalosimamia haki, usawa, umoja, utulivu na mshikamano wa kitaifa.

Ameeleza kuwa Mwenge wa Uhuru ni chombo muhimu cha kuhimiza haki, usawa, umoja na uwajibikaji katika ujenzi wa Taifa, sambamba na kuangaza na kutokomeza maadui wa maendeleo ambao ni umasikini, ujinga na maradhi, ikiwa ni utekelezaji wa dhamira ya viongozi waasisi wa Taifa la Tanzania, Mwalimu Julius Kambarage Nyerere na Mzee Abeid Amani Karume.

Rais Dkt. Mwinyi amesisitiza kuwa amani, umoja, utulivu na mshikamano wa kisiasa na kijamii ndiyo msingi wa maendeleo endelevu na utulivu wa nchi huwapa viongozi fursa ya kuandaa sera za maendeleo endelevu na kusimamia utekelezaji wake kwa ufanisi.

Amefahamisha kuwa ubaguzi kwa aina yoyote una matokeo mabaya na unaweza kusababisha hali ya kutoaminiana, utengano wa kikabila, kidini, kisiasa au kijiografia, na hatimaye kuingiza nchi katika misuguano inayoweza kupelekea machafuko na mgawanyiko mkubwa wa kitaifa.

Amewahimiza Watanzania kupinga aina zote za ubaguzi na kudumisha umoja wa kitaifa, kwani ni wakati sahihi wa kuonesha uzalendo kwa Taifa, kulinda rasilimali na kujenga kizazi kinachotanguliza mbele maslahi ya nchi.

Rais Dkt. Mwinyi amevinasihi vyama vya siasa na viongozi wake kutekeleza majukumu yao kwa kutanguliza Tanzania kwanza, pamoja na kuhakikisha tunu ya amani inalindwa wakati wote. 

Pia amewasisitiza wananchi kuunga mkono juhudi za Serikali za kupambana na rushwa nchini na kuwa tayari kuwafichua wale wote wanaojihusisha na utoaji na upokeaji wa rushwa.


Rais Dkt. Mwinyi amesema Serikali ya Jamhuri ya Muungano wa Tanzania na Serikali ya Mapinduzi ya Zanzibar zinaendelea na juhudi za mapambano dhidi ya Ukimwi kwa kuhakikisha upatikanaji wa dawa za ARV bila malipo, pamoja na kupunguza vifo vinavyotokana na ugonjwa huo hadi kufikia 24,000 katika mwaka 2024.

Kuhusiana na janga la dawa za kulevya, Rais Dkt. Mwinyi amesema Serikali zote mbili zimeendelea kuimarisha operesheni katika mipaka, bandari na viwanja vya ndege, pamoja na kutoa elimu hususan kwa vijana ili kupunguza matumizi ya dawa hizo.


Aamefahamisha kuwa hadi kufikia mwezi Desemba 2025, waraibu 18,970 walipatiwa huduma za tiba katika vituo 16 vya matibabu na zaidi ya waraibu 19,000 wanahudumiwa katika nyumba 77 za upataji nafuu.

Pia waraibu 728 walipatiwa huduma za tiba katika Kituo cha Tiba na Marekebisho ya Tabia cha Kidimni, Zanzibar.

Kuhusu ugonjwa wa malaria, Rais Dkt. Mwinyi amesema takwimu za Wizara ya Afya (SMT) za mwaka 2025 zinaonesha kuwa takriban asilimia 6.2 ya wagonjwa milioni 2.8 wa nje (OPD) walithibitika kuwa na malaria, na wagonjwa 199,347 waliolazwa hospitalini  na asilimia 11 walikuwa na malaria, wengi wao wakiwa watoto chini ya miaka mitano na mama wajawazito.

Rais Dkt. Mwinyi amesema pamoja na ugonjwa huo kuwa sugu, Serikali imepiga hatua kubwa katika kuudhibiti, ambapo hadi kufikia mwaka 2025 kiwango cha maambukizi kimepungua kutoka asilimia 8.1 mwaka 2022 hadi asilimia 5.5 mwaka 2025.

Amesema Serikali imechukua juhudi mbalimbali za kupambana na malaria, ikiwa ni pamoja na kusambaza vyandarua vyenye dawa, kudhibiti mazalia ya mbu, na kuimarisha huduma za uchunguzi na matibabu. 

Serikali pia imetenga TSh.Bilioni 10 kwa ajili ya kununua zaidi ya lita 833,000 za viuadudu vya kibaiolojia vilivyosambazwa katika halmashauri 184, pamoja na kuhakikisha upatikanaji wa vipimo na dawa unafikia zaidi ya asilimia 90 katika vituo vya afya.

Tayari Mwenge wa Uhuru umeanza kukimbizwa rasmi katika Wilaya ya Chakechake, Mkoa wa Kusini Pemba, baada ya Mkuu wa Mkoa huo, Hadid Rashid, kukabidhiwa Mwenge huo na Kiongozi wa Mbio za Mwenge kufuatia hafla ya uzinduzi.

Mbio za Mwenge wa Uhuru Kitaifa 2026 zimebeba kaulimbiu isemayo: “TANZANIA NI YETU SOTE, TUSHIKAMANE".

Comments

Post a Comment

Popular posts from this blog

CCM YAISHUKURU SMZ, WAKAZI KIKWAJUNI

Image
                                         Na Mwandishi Wetu, Zanzibar CHAMA Cha Mapinduzi (CCM), kimeipongeza Serikali ya Mapinduzi Zanzibar (SMZ) na wakazi wa majumba ya Mjerumani Kikwajuni kwa kufikia maridhiano ambayo sasa yanatoa nafasi ya kuanza utekelezaji wa mradi ujenzi wa nyumba bora za kisasa ambazo zinatarajiwa kubadili mandhari ya Mji wa Unguja. Akizungumza na wanahabari waliofika ofisini kwake, leo 05 Machi 2026, CCM Kisiwandui kujua kinachoendelea kwenye mradi huo kutokana na kujitokeza sintofahamu baina ya baadhi ya wakazi na serikali, Katibu wa Kamati Maalum NEC Zanzibar Idara ya Itikadi, Uenezi na Mafunzo Khamis Mbeto Khamis alisema kufuatia maridhiano hayo mradi huo wenye thamani ya zaidi ya Dola za Marekani Milioni 45 sasa unaenda kutekelezwa. Alisema tayari Tsh.Bilioni 1.8 zimelipwa kwa wananchi waliokuwa wakiishi katika nyumba zilizopo katika maghorofa hayo yaliy...
Read more

CCM YAONYA WATEULE MIUNDOMBINU ZANZIBAR

Image
                                          Mwandishi Wetu, Zanzibar CHAMA cha Mapinduzi (CCM), kimesema hakitamvumilia mteule yeyote wa Rais wa Awamu ya Nane, Dkt. Hussein Ali Mwinyi wala taasisi yoyote itakayoshindwa kusimamia utunzaji wa miundombinu ya  kisasa  inayojengwa  Zanzibar kwa ajili ya maendeleo ya wananchi. Akitoa tathmini   ya ziara inayoendelea ya Rais Dkt. Mwinyi  ya uzinduzi wa miradi mbalimbali ya maendeleo ikiwa ni sehemu ya maadhimisho ya siku ya Mapinduzi ya Zanzibar, Katibu wa  Kamati Maalum NEC, Zanzibar Idara  ya  Itikadi,Uenezi na Mafunzo Khamis Mbeto Khamis  alisema  kote walipoenda katika ziara hiyo, Rais Dkt. Hussein Mwinyi anasisitiza utunzaji miundombinu. "CCM tunaunga mkono kauli yake na tunafuatilia na tunasisitiza kuwa hatutamvumilia mteule  au mtendaji yeyote atakaye zembea kwenye eneo lake n...
Read more

TRA YATAKIWA IJIPANGE DIRA MAENDELEO YA TAIFA

Image
 WAZIRI wa Fedha, Balozi Khamis Mussa Omar, ameiagiza Mamlaka ya Mapato Tanzania (TRA), ijipange ipasavyo kuhakikisha kuwa inachangia upatikanaji wa rasilimali fedha kwa ajili ya kufanikisha utekelezaji wa Dira ya Maendeleo ya Taifa ya 2050 ambayo imeainisha kuwa na uwiano wa Pato la Taifa wa TSh.Trilioni 1 ifikapo mwaka 2050. Balozi Omar alisema hayo alipokutana na kuzungumza na Bodi ya Wakurugenzi na Menejimenti ya TRA wakati wa ziara yake ya kikazi katika Mamlaka hiyo, ikiwa na mara yake ya kwanza Tangu ateuliwe na Dkt. Samia Suluhu Hassan, Rais wa Jamhuri ya Muungano wa Tanzania kushika wadhifa huo hivi karibuni. Alisema kuwa Dira iliyomaliza muda wake iliitaka Tanzania kufikisha uwiano wa Pato la Taifa wa Dola za Marekani bilioni 90 hadi kufikia mwaka 2025 lakini makadirio mapya yanataka kiwango hicho kifikie dola za Marekani Trilioni 1 ambazo TRA inatakiwa kujipanga ipasavyo kufanikisha upatikanaji wa fedha hizo kwa kiwango cha asilimia 70 ili kutekeleza Dira hiyo ipasavyo. B...
Read more